چې دا هسې رنگ ماڼې کړې بې گناهه

چې دا هسې رنگ ماڼې کړې بې گناهه

وېره نه کړې د عاشق د زړه له آهه

چې په هر لوري روانه په ښېوه شې

در سره زما دعا درومي همراهه

چې دې هومره ډېر دماغ وته وگورم

بل دې سيال په جهان نشته بې بادشاه

معشوقه مې د عاشق غندنه نه کا

گل بورا وته ونه وی توره سياهه

يا په ما باندې مينه کړې دلبره

يا مې مينه ځنې ماته کړې الهه!

چا ته حال د زړه معلوم کړم، خبر نه يم

يو نېک خواه په جهان نشته بې بدخواهه

رقيبان دې غوغا کا، پروا مې نه شي

شېر به کومه اندېښنه کا له روباهه

په يوه گوزار يې درست مقصود د پوره شو

چې نگاه يې په خوشال وشوه ناگاهه