چې له هر چا طمع پرېکړې سلطاني ده

چې له هر چا طمع پرېکړې سلطاني ده

که دې زده په خاموشۍ کې سحباني ده

د حاتم د سخاوت خبرې مه کړه

لا په دا کې هم د طمعې نښاني ده

په څو رنگه د ياريه صفت کېږي

زباني ياري، ناني ياري، جاني ده

تر جاني يارانو هر څه صدقه کړه

هم په دا سبب په کار دنيا فاني ده

د دنيا په پرېشانۍ کې جمعيت دی

د دنيا په جمعيت کې پرېشاني ده

چې له دوسته له دښمنه ښه سلوک کا

د هغو سړيو ښه زندگاني ده

چې په کور کې مې څه وو تر واړو تېر شوم

و خپل يار وته مې هسې مهماني ده

په زرگونو کتابونه ملا لولي

الف بس که يې غرض مسلماني ده

په نادان باندې هم رحم شته خوشاله!

معذرت د نادانانو، ناداني ده