دا نه زهد، پارساييې دي چې کېږي

دا نه زهد، پارساييې دي چې کېږي

په هر لوري رسواييې دي چې کېږي

نصيحت د دانايانو لکه باد شو

د وگړي خود راييې دي چې کېږي

هر ناپوه په خپله پوهه افلاطون شو

څه نابوده داناييې دي چې کېږي

نه يې بر، نه برکت، نه فکر، ذکر

د شېخانو تنهاييې دي چې کېږي

مخ بدرنگ، زر و گوهر، زېور پرې پورې

څه بې ځايه زېباييې دي چې کېږي

نه يې داد نه يې دهش نه ننگ نه شرم

دا د خلق کد خداييې دي چې کېږي

د رښتينې مينې بوی نشته خوشاله!

د دروغو اشناييې دي چې کېږي