د شپې او ورځې سوال او ځواب

حجت د ورځو شپو دی ته يې ونغوږه همدمه

که ښه فهم پرې وکړې زړه به خلاص کړې له المه

چې ورځ او شپې حجت کړ، يو د بله يې صفت کړ

ويل يې منتشر شول هم له مدحه هم له ذمه

شپې ووې چې ای ورځې زما فضل تر تا زيات دی

په دا سبب چې زه يم په ازل تر تا قدمه

دوستان د خدای طاعت او بندگي ډېره په شپه کا

د شپې سجده په قدر وي د ورځې له قيمه

موسی و کوه طور وته له قومه تله په شپه کړل

هم لوط په شپه جدا شو د بېداد او له ستمه

احمد مې له اسمانه په شپه کړ له مياشت راکوزه

معراج وته يې تلنه هم په شپه وه له حرمه

يو څو وخته په تا کې دي چې لمونځ دی په کې منع

زه درسته په طاعت په عبادت يم مکرمه

تر زرو مياشتو به ده په فضل و په شرف کې

يوه شپه د شبقدر خبر واخله له عالمه

اسمان وته چې وگورې په ورځ يو شين گنبت دی

په شپه چې ورته گورې ښايسته دی تر ارمه

زه شپه يم ستر پوښه عيب فاشه مې ته ورځ يې

راحت مومي له مانه ته مې ډکه يې له غمه

چې ورځې مې له شپې نه دا د مدحې ويل غوږ کړه

په ورو يې ورته ووې چې خوله چپه کړه له ذمه

لږ وار و ماته راکړه چې زه هم در ته ووايم

څو ته هسې گډېږي په خبرو نامحکمه

روژه چې مومنان سړي لري واړه په ورځ ده

مجمع په عرفات باندې په ورځ ده له اممه

اختر دی که جمعه ده که عمره که عاشوره ده

همه واړه په ورځ دي دا له عقله له فهمه

په وخت د قيامت به د عالم حشر په ورځ وي

ايجاد د واړو خلکو هم په ورځ و له عدمه

په ما سترگې رڼا شي د عالم په تا تاريکې

يادېږم په ويل کې رڼا ورځ له توره تمه

زما څېره گونه ده له اسلامه ستا دکفر

د عيد جامه زما ده ستا جامه ده له ماتمه

ته په مثل د بادشاه يې مياشت او ستوري دې لښکر دی

لښکرې تار په تار شي چې ورځ وخېژي له همه

که پټ وي په ورېځ کې هم تر مياشتې لمر تېری کا

همه عالم خبر دی چې زر ښه دي له درمه

چې سير د گلونو د گلزار کا يا څوک ښکار کا

هغو وته په قطع نه ده شپه له ورځې سمه

په ما کې فريضه لمونځونه ډېر په تا کې لږ دي

په تا کې ځکه کم شول چې ته يې له مانه کمه