د وينو وکښلو فايده

فصد سړي لره نافع دی

د هزار زحمت دافع دی

که دخنځو دانو نام دی

که سر سام دی که برسام دی

که سکته وي که سبات وي

که وي تبه څه آفات وي

پمن والی که حصبه وي

که دخولې بده مزه وي

بد بوی دخولې يا وينه

چې يې پاس بده مزه وي

بد بوی د خولې يا وينه

چې يې پاس يا کوزې وينه

که خناق که مفاجا وي

له فاسدو وينو دا وي

چې وکاږې له قيفاله

وينې لاښې وي ای لاله

هفت اندام وي که قيفال وي

فصد وهل دې کال په کال وي

تر پينځوس چې عمر تېر شي

د فصد کار دې لږ نه ډېر شي

په سپرلي په مني ښه دی

فصد په بل اوان ښه نه دی

درد د کام آماس دکومي

په هر ځای علت د سپومي

فصد ، جلاب دا دواړه څيزه

لازمي گڼه عزيزه

بل غشيان ور سره هم دی

هره مياشت غشيان لازم دی

څوک چې کا دا دوه، درې کاره

تل به خلاص وي له آزاره

چې دهر زحمت دوا دي

فصد، جلاب، غشيان هم دا دي

په ډېر رنگه جلاب کېږي

هوښياران به پرې پوهېږي

ښه جلاب د هليلې وي

د تروې هم ورپسې وي

عام و خاص لره چې ښه ده

ښه تازه جمال کوټه ده