ديارلسم باب په بيان د جدوجهد کې

جد، جهد کار د مرد دی

کله مرد دی چې دلسر د دی

جد: کوښښ، سعې ته وايې

چې مطلب لره مرد بيايې

جهد: رنځ، محنت څکول دي

و مقصود ته رسېدل دي

جد، جهد کار د چا دی

چې د لوی همت فتا دی

څو همت د سړي څومره

جد، جهد پکې هومره

په همت چې مرد عالي وي

له سستيې نه خالي وي

چې سړی کاهلي کاندي

سستي وريشي ورباندې

څه دستياب نه شي له پټه

چې لاس وکاږي له مټه

جد جهد چې کوم ځوان کا

څه منت قبول په ځان کا

مرد مقصود په کوښښ مومي

د کوښښ په لار دې درومي

په کوښښ کې مردن ښه دی

بې کوښښه زيستن څه دی

په کوښښ ژوندی زنده دی

چې کوښښ نه کا مرده دی

باز چې درست کوښښ آغاز کا

منگول سره په زرکه باز کا

چې مېږی ووځي له سوړې

کا دانې په سوړه جوړې

تر مېږي، تر بازه پورې

خو کوښښ دی نشته نورې