دخپل سيند تعريف

د لنډي اوبه سلسالې

د حيات د اوبو سيالې

تر نباتو نه خوږې دي

د فرات تر اوبو ښې دي

لذت ناکې تر نبات دي

خوشگوارې تر فرات دي

که يې خضر پياله وڅښي

دحيات اوبه به نه څښي

زه چې هسې تشنه لب مرم

روز و شب يې په طلب مرم

که يوه پياله يې نوش کړم

غم به واړه فراموش کړم

پاکيزه لکه زلال دي

نوې نوې کال په کال دي

سرچشمې لري په نور کې

دجنت په الطهور کې

د مستانو غوندې کار کا

دېوانه غوندې رفتار کا

درته وايم چې پسو ځي

ځگ په خوله زنځير په پښو ځي

په غورزي غورزي چې درومي

زړه هيبت ورځنې مومي

چې شامل شي له سيحونه

بيماري کاندي بېرونه

د سيحون اوبه گشت نه کا

دی پرې گډ شي گشت هاله کا

د کابل واړه رودونه

د کونړ د سوات سيندونه

سره يو شي په سرای راشي

د سيحون سره يکجا شي

نه يې ږغ نه يې نارو شته

په هر جام کې يې دارو شته

چې يې څښي، پکې شنا کا

ما دې ياد هغه اشنا کا

چې يې څښي پرې وينځي مخ

د هغو دی همېش سخ