دارو د نس د خلط د هر علت د اشتها

هليله څلور درمه

په حساب نه بېش و کمه

پترج لس درمه زويه

ناکيسر هم دا هومره بويه

دوه درمه زيره توره

شل درمه دڼيه بويه

قلفل دراز انباله بيد هم

شل شل دا سياه سفيد هم

شل درمه دې گلوي وي

شل دې نور شماق پروي وي

دا همه شي نهه څيزه

چې يې وشمارې عزيزه

دا همه سره ميده کړه

بيا همه سره بېخته کړه

دوه سو چهل درمه گوړه

نه څه بېش و کمه گوړه

دارو وگوړې سره گډ کړه

ته يې ښه سره گډوډ کړه

ځنې سازې کړه گولۍ

په مقدار د بهلولۍ

هره ورځ يې په ناشتا خوره

په آغاز يې د شتا خوره

طبيعت په دې صفا کړه

خلط به لرې واړه ستا کړه

که دې رنگ په زحمت زرد وي

يا دې نور د گېډې درد وي

دا به واړه ځنې دور شي

په صحت به دې مخ سور شي

اشتها به دې شي ډېره

خورنده به شې تر سېره