دارو د نزول يعنې آب مرواريد

د نزول دا ښه دارو دي

مبتدي د رنځ جارو دي

ښه توتيا نيلا توتيا وي

چې ښه شنه وي بې همتا وي

ور سره هليله زرده

برابر دواړه ای مرده

په تول سم سره ميده کا

په بصر کې يې سيده کا

تل دوه درې ميله اخله

بيا پرې خوب وکا څمله

چې دې درست زحمت ورکېږي

په بصر دې پورې کېږي

په دنيا کې که هرڅه شته

تر دې بل دارو ښه نشته

د نزول علت بلا دی

د چا مه شه لا دوا دی

چې جراح يې پردې واکا

مگر هله څوک بينا کا

ما يو نقل دی ليدلی

په "شفا عليل" کې کښلی

هغه نقل درته کښمه

زه له خپله نه وايمه

فراشتک مرغی بسمل کا

د آهو وازده حاصل کا

د سر وازده يې گداز کا

چې سکاره شي بيا يې ساز کا

د رنجو غوندې يې جوړ کا

د آس والي تاو يې سوړ کا

د سپين پياز اوبه عليله

په چشمانو کړه دوه ميله

بيا ميده دارو پرې ورکړه

پټۍ سختې په بصر کړه

په دا شان کړه درې ايامه

گوندې روغ شي نېک فرجامه