فصل - ذکر د طلاق

روايت په اتفاق دی

په څلور رنگه طلاق دی

يو سنت دی بل بدعت دی

بل بائن په شريعت دی

بل رجعي دی ويې نغوږه

پومبه وکاږه له غوږه

په دا باب قرآن گويا دی

څلور رنگه طلاق دا دی

چې سنت دی زماجانه

ته يې ونغوږه له مانه

که دې ښځه شوه بد ژواکه

چې ښه شي له حيضه پاکه

نزديکي ور سره مه کړه

يو طلاق ور کړه دا زده کړه

چې عدت ورباندې تېر کړه

بل طلاق به هله وير کړه

چې دويم حيض پرې تېر شي

په دويم طلاق به وير شي

چې دويم طلاق هم وير کړه

بيا به بل حيض پرې تېر کړه

نور په درې طلاق ولاړه

نا محرمه شوه مرداره

که دې زړه ورته بيا وشي

بويه دا چې په مېړه شي

که هغه يې کا طلاق

نور دې بيا شي درته حاق

بيا پرې نوې نکاح وکړه

چې پوهېږي هسې ته کړه

حلاله دا کار باله شي

چې عدت تېر کا هاله شي

که عورته حامله وي

حکم دا دی که دې زده وي

چې فارغه شي له باره

دا عدت سره وشماره

د بدعت طلاق دا شينه

چې په حيض يې ورکوينه

يا چې درې طلاقه ورکا

يوځل داهم بده چر کا

د بائن طلاق پوهېږي

خبردار شه که خبرېږي

چې طلاق څرگند ورنه کړې

کار په رمز کنايت ته کړې

چې مې لار په تا پرانستې

نه يې نور راسره نشتې

يا زما په ملک کې نه يې

يا دمور و د پلار ته يې

ما مور پلار وته بخښلې

يا نور گرځه مخ پوښلې

يا مې ته آزاده کړې

بېگانه مې يې نومړې

يا نکاح مو سره نشته

يا مباح مو سره نشته

يا مې ته عورته نه يې

يا پردۍ يې دخپل زړه يې

که دا هسې څه څرگند کا

چې په زړه کې طلاق بند کا

چې بائن طلاق وي دا وي

دوه که نيت که يو ادا وي

که په نيت کې درې لرينه

واړه درې طلاقه شينه

که ته ووايې ای عامه

چې په ما يې ته حرامه

يا نور زه حرام په تا يم

په داڅه شي درته وايم

که دې نيت د طلاقه وينه

شک ومه کړه طلاق شينه

که ته وايې ما دروغ وی

طلاق نه شي دا تا روغ وي

که په زړه دې طلاق وينه

يو بائن طلاق دا شينه

دا طلاق بائن طلاق دي

دخول بويه که مشتاق دي

که حلال دخدای ووايي

چې په ما حرام ونمايي

دا هم هسې رنگې کاردی

ستا په نيت سره مدار دی

که نکاح مېړه ته پرېږدي

يا پول زر ورباندې کېږدي

که په دا يې کا طلاقه

بائن شي له اتفاقه

بائين يو طلاق که دوه وي

په عدت عورتينه وي

که عدت ورباندې تېر شي

تر عدته ډېر لا تېر شي

د بائن نکاح مباح دی

که يې کا نوی نکاح دی

حلاله د بائن نشته

مسئله ده بې کاهشته

چې بائن طلاق صادر شي

په دا کار دې مرد حاضر شي

ژکه نور د زما دله

بيوه کاڼې د خپله

چې يو بل طلاق واقع شي

نور دې دی ځنې دافع شي

که يې بيا شوه چرې ياده

حلاله ده له استاده

بل طلاق رجعې دی ياره

تر بائن سپک يې وشماره

که ته ووايې ناچاقه

خپلې ژکې ته طلاقه

يا دې لفظ تر خولې بدر کړو

چې مې تاته طلاق در کړو

که دا هسې څه ظاهر کړې

يو رجعې طلاق ظاهر کړې

که دې درې طلاقه دينه

په زړه هم يو طلاق شينه

چې عدت باندې تېر نه وي

رجعت وکړه رجعت ښه وي

يا دخول ور سره وکړه

په خبره يې زړه ښه کړه

وايه ته مې يې عورته

يا يې کښل کړه له ښه نيته

يا کنار ورسره وکړه

يا درست کار ورسره وکړه

يا يې تن ته نظر بويه

رجعت دا دی زما زويه

که عدت پرې گذاران شي

بويه کار دې په دا شان شي

نوی عقد نوی کابين دی

کار دا هسې شان يقين دی

او نساء وي په عدت کې

نشته شک په روايت کې

نفقه دې ورکوينه

په ښه ځای دې يې ساتينه

رنگ و بوی جامې رنگينې

که گنډ گينې که ورېښمينې

آرايش دځان څو رنگ

زېب زينت په څو آهنگ

په عدت کې که يې کاندې

نشته دا په ښځه باندې

ځان دې خوار حيران ساتينه

چې ونه شي ورته مينه

په رجعې طلاق کې بويه

چې جدا نه ده له شويه

آرايش دې ورته کاندې

گوندې باندې شي پرې باندې

په رجعت کې رجعت وي

د گواهانو څه حاجت وي

د هلک طلاق هيڅ نه دی

که يې ورکاندي هم څه دی

لېونی هم په دا شان دی

چې طلاق يې بې نقصان دی

که دخمر مست مخمور دی

د هغه طلاق منظور دی