غندنه د بادشاه او دده د حال

يا خوشال خټک کافر دی

قاضي کښلی پر محضر دی

چې پادشاه پرې نه گروهېږي

نه يې زړه باندې نرمېږي

يا بادشاه په ځان جهود دی

د مومن آزار يې سود دی

په دا منځ کې داور خدای دی

ورمعلوم د هر چا رای دی

بادشاهان چې ستم ناک شي

په خلل دخلقو ژواک شي

بادشاهان چې نا انصاف شي

خلق خوار په هر اطراف شي

بادشاهان چې بې تميز شي

چې عزيز وي نا عزيز شي

بادشاهان چې بې خبر شي

کار د ملک واړه ابتر شي

بادشاهان چې ناحق جن شي

اور يې پورې په لمن شي

د بادشاه طاعت د ځان دی

دده عدل دجهان دی

د اورنگ عدل بخښلی

خود دعدل کار خټلی

خدای خبر په دا بادشاه دی

چې گمراه دی ډېر گمراه دی

که رښتيا وايم ابليس دی

ډک په مکر په تلبيس دی

سزاوار دی د لاحول

نه سوگند لري نه قول

په فريب په مکر طاق دی

دخناسو په اخلاق دی

ظلم کار دی ستمگار دیف

نه په زويه نه په پلار دی

ټول ارکان دده گورگان دي

تعيين شوي په جهان دي