حق د مرد په عورت

حق د مرد په زن بسيار دي

لږ مې تا وته په شمار دي

په خدمت دې وي تياره

لکه وينځه پرستاره

چې مېړه ورباندې راشي

دا دې خوښه په خندا شي

که يې زړه غمونه رغاندي

هم دې ښه وته وخاندې

دا دې زر پاڅي له ځايه

په خندا دې شي له ورايه

ځای دې ښه ورته تيار کا

په بستر دې يې قرار کا

که موزې وي که پيزار وي

په خپل لاس دې يې دا چار وي

په هر رنگ چې خوښي مومي

د مېړه په رای دې درومي

په رومال دې يې مخ پاک کا

په ډېر رنگ دې پرې تپاک کا

په رومال دې يې مخ پاک کا

په ډېر رنگ دې پرې تپاک کا

څو چې زېرمه د طعام کا

په مېوه دې يې خوږ کام کا

ناست ولاړ دې هسې کاندي

لکه حکم وي پرې باندې

که پرې حکم هسې وينه

ور سره دې طعام خورينه

گڼه کاروبار دې کاندي

يا په وروستو يا په وړاندې

که مېړه يې خندا غواړي

دا دې خاندي هم دې وياړي

که غزل وي که بيتونه

که سندرې که صوتونه

مسخرې دې کا آغازې

موافقې دلنوازې

که مېړه يې خشمناک وي

دا دې هم ځنې بې باک وي

کار دې نه کا د بې باکو

سېب خنظل وي په غمناکو

دا ويل د پيغمبر دي

په مشکوت کې معتبر دي

چې په ژبه مېړه خوږ کا

خدای به کل ښادي پرې خوږ کا

لويه ورځ چې دمحشر وي

ددې ژبه به لوی غر وي

تر قفا به وي وکښلې

غوټه سخته پرې وهلې

ځان دې جوړ ساتي شوهر ته

مچ دې نه پرېږدي خپل سر ته

که تنها يې خپل پدر وي

هم ددې دې ترې حذر وي

مجالس دې له هغوی کا

چې دنېکو گفتگویکا

زړه ځوانه هرزه کاره

لا په تېر بوډۍ مکاره

دا دې نه پرېږدي خپل ځانته

چې آفت وي ځان ايمان ته

د مېړه خونه دې ژغوري

نامحرم ته دې نه گوري

لوړ آواز نه دې له کوره

نه په ورځ نه په شپه توره

دمېړه بې اجازته

نه د پلار کره رخصته

دمېړه له ډکه کوره

که ضايع کړه يوه توره

هغه توره به ماران شي

حواله به يې په ځان شي

هره چار دې په رخصت کا

گڼه واړه خيانت کا

دمېړه حکم دې ژغوري

و فرمان وته دې گوري

که خپل مال هومره لرينه

چې په کار دمېړه شينه

په خندا دې واړه وار کا

مال څه ځان دې ترې هم ځار کا

که مېړه يې عيب ناک وي

هم دې دې ته لک پاک وي

مردان هيڅ نه دي کږلي

تور وسپين واړه ښاغلي

چې پرې نوم دمرد وي پورې

واړه ښه دي که يې گورې

که دروغ کا که رښتيا کا

دا دې واړه آمنا کړه

دا حديث د محمد دی

چې يې نه مني مرتد دی

سجود خدای وته کاوه شي

بې له خدايه سجود نه شي

که نور چا وته روا وي

خپل مېړه ته د نسا وي

چې عاصي وي له شوهره

په اسلام کې ده کافره

که روژې کا که نمونځونه

خير خيرات دعا نفلونه

دا به واړه نه قبلېږي

که هر څو يې ډېر ډېر کېږي

که جنت غواړي نېک زن

پرې رويه سيمين تن

په رضا کې د شوهر دی

ورته ايښی برابر دی

له ښه ځايه ښه عورته

خالي نه وي له حکمته

ددې چار هنر ورزي وي

هم دوبي وي، هم درزي وي

هم لا وينځه وي همدمه

هم د خوني وې حاکمه

چې خوراک پخوي دا وي

باورچي وي هم سقا وي

ک رښتيا وايم ای ناسه

لا مېړه ته وي کناسه

مصاحبه وي حبيبه

دارو گره وي طبيبه

باور وکړه ښه عورت

په دنيا کې وي جنت