حق د پير استاد په مريد په شاگرد باندې

حق د پير استاد دواړه

د خپل پلار تر حق زيات غواړه

شېخ په قوم کې کا النبي دی

په تر آبه نسبي دی

چې حرمت د پير نه کاندي

خود به خوار شي ورستو وړاندې

چې ويښته په دين کې سپين کا

هغه پير دی که يقين کا

لکه حق د پير استاد دی

د استاد هسې لا زياد دی

که په رای د هغې درومي

دين دنيا به دواړه مومي

چې دې خلاص کاندي له جهله

ته دا کار مه گڼه سهله

جهل لرې کا له تانه

دانايي در کای ای جانه

د حديث په حکم ياره

هر سړی لره درې پلاره

اول پلار چې د ميلاد دی

دويم سخر دريم استاد دی

دريم پلار دې لا عزيز دی

چې درکړی يې تميز دی

چې يې پوه په شريعت کړې

ددې پلار به ډېر منت کړې

که په حق د استاد کور يې

په دنيا په دين مختور يې