حقيقت د يوسفزي راته معلوم شو

حقيقت د يوسفزي راته معلوم شو

کاروبار يې راښکاره شي په دوه رنگه

يا به کور په کور اخته شي په ميرڅيو

يا به ملک و مغول ورکاندي بې جنگه

خدای چې ورک کا ښه مړونه په ولس کې

پېښوي هغه ولس وته بيا ننگه

اوس په درست ولس کې ښه ملک عبدل دی

که يې ژر کا خدای څېره په مرگ بدرنگه

حمزه خان هغه چمند دی په جلگو کې

وړواندې وروسته پړي پرېکا له غورځنگه

د طالي ملکي تته آيينه ده

چې څېره په کې ليده شي رنگا رنگه

طالي چرگه نرښځی دی په ديدن کې

لوی چار خويل لکه دچرگ په هويو کړنگه

الهداد لکه لمچی په جيفه گرځي

د مردارې بوی يې ځي له دواړه چنگه

مصري خان مندړ د غاړې ماهي اخلي

سگ لاهو غوندې ځان ژغوري له نهنگه

مصري خان مندړ پټ شخوند کوي په وره کې

لکه پېغله جل په حيض کې روژه ړنگه

نوم يې څه د کشرانو په خولې اخلم

چې يې واړه ملکان وينم بې ننگه

مختصره وينا دا، د بازار سپي دي

په ډوډيو پسې درومي څو فرسنگه

بس دا هومره نور څه مه وايه خوشاله

دخټکو لښکر نه لرې د څنگه