جواب د ونژي د عطسې

د عطسې جواب واجب دی

په هغه چې مصاحب دی

چې سپاس باندې ووايي

چې يې واروي جواب ښايي

که عطسه د زکامي وي

که جواب يې کړه خامي وي

د يوه جواب کافي دی

نور مجلس په معافي دی

پېش دستي په عطسه ياره

د واړو سره وشماره

درد د گوش که د دندان وي

درد دل لره درمان وي

په آيت په حديث ياره

سلام فرض په ځان وشماره

چې سلام و کا وتاته

راشه غوږ باسه و ماته

د سلام جواب ښه ور کړه

لا تر ده يې ښه ته ور کړه

تر رحمت که دا اثبات کړي

پوه يې اوږد تر برکات کړي

سور که پلي ته سلام کا

حبذا کار د اسلام کا

که سلام کا ايستاده ته

رونده ښه نشسته ته

ډېرو لږو ته سلام کا

ځان دې ښاد په دا اکرام کا

چې خپل کور لره ور درومي

په سلام به ثواب مومې

ښۍ پښه کېږده د وړاندې

که څوک نه وي په تا باندې

هم سلام دی چې ووايه

برکت غواړه له خدايه

که مسجد خالي له چا وي

هم لازم سلام په تا وي

که ډېر ناست وي يو پرې ور شي

هم سلام ورباندې زبر شي

په سلام يې معافي وي

يو جواب ور کا کافي وي

د دانا د ژبې پند دی

تر شکرو يې ښه خوند دی

څوک چې ناست وي سلام وله

ور سره کېنه ای دله

که د ښو خبرې کاندې

برکت اوري پرې باندې

په صحبت يې بهره مند شه

په خبرو يې خرسند شه

که دشر کاندي خبرې

ځنې پاڅه زر شه لرې

په اوه ځايه ای ياره

ته سلام مکروهه شماره

يو چې لوستل د قرآن کا

چې قامت کا يا آذان کا

په نمانځه چې څوک ولاړ وي

د خطبې په فکر ولاړ وي

يا په کار د استنجاء وي

يا طعام خوري په غوغا وي

لېوني ته سلام مه کړه

مست د ميو، هلک زده کړه

چې له دې نه بېگانه وي

که په عقل فرزانه وي

و هغو ته سلام بد دی

لا په تېره چې مرتد دی

د سلام جواب يې نېک دی

هم دا هومره يو عليک دی