که د زړه څه خو ترس، ډار وای څه به ښه و

که د زړه څه خو ترس، ډار وای څه به ښه و

لږ دې مهر په ما خوار وای څه به ښه و

زه چې ستا له غمه زار کړم ستا په در کې

که دې غوږ زما په زار وای څه به ښه و

چې په ما باندې پېغور کا ستا په عشق کې

ستا له حسنه خبردار وای څه به ښه و

هر چې نن دزهد لاف کا په جهان کې

په ليدو دې پرهېزگار وای څه به ښه و

پس له مرگه مې يو هسې مکان گور شوای

چې پرې تل دکښليو لار وای څه به ښه و

ستا په کوی کې ډېر کوټه تازيان پراته دي

زه هم گډ د دوی په شمار وای څه به ښه و

ستا په غم به په دا لږ عمر موړ نه شي

د خوشال عمر بسيار وای څه به ښه و