که په کار دې ده د خدای پېژندگلي

که په کار دې ده د خدای پېژندگلي

پيروي د محمد کړه، د علي

هر آيت چې به راته پاسه له عرشه

لا په عرش به يې علي و متلي

محمد چې هغه راز يې په معراج کړ

يکا يک و وعلي وته جلي

په محشر به هغه تور مخونه پاڅي

چې يې نه دي تورې خاورې د تلي

محمد، علي چې دوه وينې په سترگو

په دا کار کې احولي ده احولي

د زړه زنگ په بل صيقل نه لرې کېږي

په دوستۍ يې د علي ده مصقلي

که دا هومره ويل کا ورته رخصت دی

محمد دی پيغمبر ، علي ولي

چې په بغض د علي يا دعمر دي

رافضي دي، خارجي دي خللي

د علي د آل دوستي د ايمان زړه دی

څوک دې شک په دا په زړه نه راولي

چې تر منځ د چار يارانو بد ويل کا

په مذهب کې د هغو ده درغلي

د علي د آل په مدح کې جنت دی

د خوشال خټک په دا ده تسلي