ښه هغه چې ښه يې رنگ ښه يې جمال دی

ښه هغه چې ښه يې رنگ ښه يې جمال دی

ښه هغه چې په قوت د هر چا سيال دی

ښه هغه چې په ميراث خاني، ميري کا

فراغت بې غمه ناست صاحب اقبال دی

ښه هغه چې که احمق وي که جاهل وي

په طالع، په تخت صاحب د ملک و مال دی

ښه هغه چې په رشوت قاضي گري کا

په مسند د قضا ناست په قيل و قال دی

ښه هغه چې ډېر لښکر ورپسې درومي

ډېر يې کبر، ډېر يې جاه، ډېر يې جلال دی

ښه هغه چې په مجلس د ملوک ناست وي

تمامي عمر يې زيست، روزگار ټيټال دی

په عالم کې بدي نشته واړه ښه دي

چې و بدو ته روغ دی يو خوشال دی