ښه هغه چې لاړ بېخوده په خيال ستا دی

ښه هغه چې لاړ بېخوده په خيال ستا دی

که اشغال دی په جهان کې، اشغال ستا دی

ښه مې وليدل په سترگو واړه کښلي

چې تر واړه لا تيری کا، جمال ستا دی

د دنيا په مخ به ډېر وي لذتونه

چې ترهر څه ډېر لذت کا وصال ستا دی

دواړه زلفې دې حلقې کړې لکه لومې

چې دانه دې په دا لومه کې خال ستا دی

دواړه پښې گلگونې سرې په دماغ درومې

گوره! بيا څومره وگړی پايمال ستا دی

ته کشتن د غمزې کړه، مه ودرېږه

مقتولانو قبول کړی و بال ستا دی

تا خو نوم دجنجالي راباندې کښېښود

که په زړه کې مې جنجال دی جنجال ستا دی

که همه دخلقو کښلي سره ټول شي

خسته زړه مې په ټولي کې لېوال ستا دی

چې دې څوک په کوڅه تېر شي، نور مين شي

چې تمام له عشقه روغ دی دېوال ستا دی

که مثال د صورت غواړې گوره مياشته

چې پوره د دوو هفتو شي مثال ستا دی

چې سبا، بېگا يې لوندلرم په اوښکو

يادگاري راڅخه پاتې رومال ستا دی

څو ريبار درسره نه بيايې د وړاندې

چې په چم به يې تېرېږي مجال ستا دی

که په قهر يې شړې په لطف يې بولې

چې يې نه پرېږدې په هيڅ کې خوشال ستا دی