خپل عمل چې سړی سپک کا

خپل عمل چې سړی سپک کا

لکه خس هسې يې ورک کا

بد عمل لېونی سپی دی

چې حملې په خپل کنډک کا

مگر نه گوري و ځان ته

چې احوال پېغور د پک کا

مزری ښکار کا دگاوزر

پيشو گرځي ښکار موږک کا

دا خبره ده چې کېږي

که کيسه يې د دوتک کا

چتی، باز په پرونه شو

که الوځي پر پرک کا

چې بيزو د بازيگر شو

نن څه ناسته په انډک کا

زما ژبه نه ده اور ده

گوزارونه د ټوپک کا

چې زما اختيار يې خوار کړ

خدای دې خوار هغه خټک کا

خوشال ناست په برمول دی

ارمانونه د اټک کا