خواږه عمر غوندې تلنه کوې ښه

خواږه عمر غوندې تلنه کوې ښه

په مدت د ديدن ژمنه کوې ښه

په ناستي دې رغېدن د بيمار وشي

په ولاړې پښې پوښتنه کوې ښه

خوی دې درست د ترهيدلي غرڅه واخيست

وړاندې ځي ترشا کتنه کوې ښه

دا د زړه ښهر مې ستا دی،چې په سترگو

باندې هر کله ختنه کوې ښه

په خوله ما سره دروغ، دروغ ياريه

وېزاري د زړه دننه کوې ښه

هم په څو رنگه غمونه باندې کښېږدې

بياگيله له دې غمجنه کوې ښه

هم په څو رنگه عتاب کړې، بيا پخپله

بورجل ځای ته مې بلنه کوې ښه

په زمان کې يوگلزار دوصل نهال کړې

بيا په خپل لاس يې وکښنه کوې ښه

وصل هجر دې دا دواړو په خپل لاس دي

چې ماڼه له خپل مينه کوې ښه

د خوشال په زړه دې کښېښودل داغونه

پرې دمالگو دوړنه کوې ښه