لاله گل يې تر جمال پورې بدرنگ دی

لاله گل يې تر جمال پورې بدرنگ دی

دزلفينو يې دچين له مښکو ننگ دی

تورې وروځې يې ليندې باڼه يې غشي

د عاشق تر زړه يې تللی هر خدنگ دی

دواړه سترگې يې په تن تورې بلا شوې

همېشه يې دعاشق له دله جنگ دی

ته به وايې حبشې شکرې پېري

هغه خال يې چې د دوو شونډو تر څنگ دی

تجلی يې دجمال لکه مشال شوه

خوار عاشق په دا جمال باندې پتنگ دی

چې له غوږو يې مقصود مومي لښتۍ ده

چې له پوزې يې مراد مومي لونگ دی

په ښايست کې يې تقصير د صورت نشته

خو يو دغه عيب لري چې په زړه سنگ دی

د هر چا په خپل غرض پسې کوشش دی

د خوشال يې په جمال پسې اهنگ دی