نظم
مثلث
Khushal Khan Khattakد پيسو په ټولول لکه مږک دی
چې پيسه ورځنې درومي زهره ترک دی
د غوولي دنيا دار په کونه کک دی ـ
نه په ځان نه يې په بل خوري خونه خوري
د نېستۍ له وېرې تل په ځان هسک پک دی
د غوولي دنيادار په کونه کک دی ـ
خدا دهر بنده د روزي ضامن شوی
لا په دا يې دکتاب په توري شک دی
لور برمنډه، زوی برمنډ، تبکی په کور کې
د عورتې يې په کوس نښتی خشتک دی
د بخيل په کونه توی نه دی نو څه دی
کوناټی يې د اوگرې په اوبو ډک دی
چې بيماره بزه يې شپون په چاړه کږي
په ژړا په واوېلا د بزې په غک دی
په پينځه روپۍد لور واده تمام کا
که ولور يې په وار وار خوړلی لک دی
طاق يې هيڅکله ډيوه ليدلې نه ده
په تورتم کېې په مثال دښاپېرک دی
پښو يې درست عمر کېړۍ نه دي ليدلې
له کپرې يې دپښو تلی لا کلک دی
څو خښی په کور کې يښی مره له لوږې
د نرخونو کمېدو ته غله رک دی
غوايې شته غېلې يې شته چې ورته گورې
په روزگار کې تر گدای بتر مردک دی
د غوولي دنيادار په کونه کک دی ـ
ښه چې خدای له بخله ته خلاص کړې خوشاله
عمر ډېر په خوشې ولاړ پاتو اندک دی
د غوولي دنيادار په کونه کک دی ـ