نجومي چې قدم نه ږدي بې نجومه

نجومي چې قدم نه ږدي بې نجومه

موت و فوت و ناکامي مومي له کومه

چې گړۍ گړۍ د ورځو شپو تېرېږي

په کې راشي په چا نېکه، په چا شومه

ځان به خلاص نه کا د بد ساعت له شره

نجومي يې که خبر دی له علومه

نېک و بد يې په قبضه کې د قضا دي

بېهوده خبرې مه پيمه، وردرومه

مقدر به په هيڅ رنگ مبدل نه شي

هر سړي لره ورځي برخه مقسومه

که په پوهه افلاطون د زمانې شې

دقيقه به د قدر نه کړې مفهومه

گوډی چرگ تر ځمکې لاندې اوبه ويني

ولې نه ويني د مځکې په سر لومه

په تنزري نن د گانده حال معلوم دی

ولې بند شي دهلکو په کړکومه

ورځ و شپې سره همه نه دي يکسانې

نن يوه ده گانده بله شي معلومه

و سړي ته وار په وار هغه رسېږي

چې دده په پېشانۍ باندې مرقومه

په خوشال يوه هغه ده، بله دا شوه

بيا به گوره، په قسمت پېښه شي کومه