ناز، نخرې، مهر، خندا، فتنې، جنگونه

ناز، نخرې، مهر، خندا، فتنې، جنگونه

د خپل يار سره هم تا زده، دا رنگونه

کله، کله خوا په خوا غاړه غړيه

کله تښته په دوو پښو په غورځنگونه

چې زما سره يې ناسته په پالنگ وه

اوس مو پرېوتل په مخ کې فرسنگونه

په ليدو پسې کچکول واخله ملنگ شه

مينه کا دا هسې چارې آهنگونه

په نصيب د روغو زړونو فراغت دی

په قسمت دخوږو زړونو الهنگونه

عاشقي به هغه کاندي چې تر شا کا

زيست روزگار، شرم پېغور، وېره ننگونه

چې بوسې دجفا جويو دخولې اخلي

گوندې اخلي له ياغيانو قلنگونه

څوک مايوس څوک په اميد د يار دوصل

څوک پراته غاړه غړۍ په پالنگونه

په ليدو به يې دگور مړي سر هسک کا

که پرې درومي د پايلو په ژرنگونه

که پستې پستې د راز خبرې نه کا

دجنت دحورو مه وينم رنگونه

زه خوشال د آهو چشمې مينې سر کړم

د غرڅه غوندې په هسې گړنگونه