اووم فصل - په بيان د نوي باز کې

نوی باز چې په جال کښېباسې دامداره

باندې هيڅ مه کړه ناره د خدای د پاره

خپل ور بوز په څادر ونغاړه ورو ورشه

ښه يې ونغاړه په جال کې پرې خبر شه

بند يې واچوه په پښو کې سترگې دواړه

ښه يې وگنډه په مزي ويې نغاړه

يو څو څاڅکي اوبه واچوه و باز ته

هيڅوک مه پرېږده سړی و ولوړ آواز ته

بيا يې کښېنوه په لاس آواز پرې مه کړه

اوبه غوښې په ښه طور ورښکاره کړه

کوز يې کښېنوه په ځمکه چې ځان ساز کا

زړه په ځای له ډېرې ويرې هغه باز کا

که يې وخوري که يې نه خوري په خپل طور

په رضا سره يې پرېږده مه کړه جوړ

نوي باز لره يا زر که يا کوتره

يا د چرگ يا د دراج غوښه ده غوره

هم دا هسې رنگ دې خوري غوښه ډېر وخته

تر هغه چېپه څربښت کا سينه سخته

پر مهره دې خوري تلخه دې خوري له دله

کوچ نبات سره گډوډ هم کله کله

وازده بېله ځنې توږه توره غوشه

ور کوه و باز ته وللې لتکشه