په اختر په جمعه څه عرض دما

په اختر په جمعه څه عرض دما

زه مجنون يم سر نيولی په صحرا

هغه وخت د ما اختر دما جمعه ده

چې ديدار راته ښکاره که د ليلا

عاشقان د عشق له کاره انکار نه کا

فاسقان به په خپل زړه کې لري غلا

د يار به لايق نه دی رنگ يې ورک شه

چې يې نه وي په ياريه کې وفا

د رښتينې يارۍ لافې ډېر عالم کا

ولې ما په کې ونه ليدل رښتيا

هی توبه د عشق د پټو سرو لمبو نه

نه واښه ته يې لرگي ، لگي په تا

په يرغ په مصلحت د عشق کار نه دی

په ليدل په اروېدل شي را پيدا

نه په پنډ لوېږي له هر کاڼي بڅري

دې سوخته سره بکر لري سودا

دا رنگينې معنی چېرې دي خوشاله!

چې را درومې لکه گل په بياض ستا