پښتانه په عقل پوهه څه ناکس دي

پښتانه په عقل پوهه څه ناکس دي

کوټه سپي د قصابانو د جوس دي

بادشاهي يې د مغول په ټنگو بايله

د مغول د منصبونو په هوس دي

اوښ له باره په پخپل کور کې ورغلی

په اولجه د اوښ دغاړې د جرس دي

د نفرين لايق په نام سړه بني دي

له اوله که دا نور ورپسې پس دي

چې دا وار په دا دوران ور څخه ولاړ شو

د مغولو ستانې لويې يو په لس دي

بې ننگان د بې ننگيه کاروبار کا

ننگيالي د ننگ په کار کې هر نفس دي

سر يې هورې کندهار، لم يې د مغار دی

په دا منځ کې مېشته واړه پرې عسس دي

له دې بابه ويل ډېر وشول خوشاله!

خاموشي وکړه، دا هومره ويل بس دي