څوارلسم باب په بيان د ثبات کې

ثبات کار دی د مردانو

برکت لري يارانو

پښه چې ټينگه شي په چار کې

برکت پرېوځي په کار کې

چې انجام دمهمات دی

که نظر وکړې ثبات دی

د ثبات فوايد ډېر دي

تر حساب تر شماره تېر دي

چې ثابت د مرد قدم وي

فتوحات پرې دم په دم وي

ثبات هر چا لره ښه دی

لاملوک لره بايده دی

په ثبات کې استظهار شته

په ثبات کې استبشار شته

څو چې لوی بلا يې لويې

لور په لور شي پرې راتويې

په ثبات کې که ته ته يې

مه وسوس کړه، مه زړغييې

پل ثابت اخله له ځايه

خپل مراد غواړه له خدايه

چې بل ږدي غړي يې رېږدي

پل به کله ثابت کښېږدي

چې ملوک ثبات ته شا کا

دوست، دښمن پورې خندا کا

بې ثبات که هر څو ښه وي

د غليم وېره ترې نه وي

نه د دوست وي پرې وتنه

تل ناخوښ اوسي له ده نه

نا ثبات سړی ناښاد وي

د هر چا ځنې فرياد وي

په بد رنگ يې کار نورېږي

درست عالم ځنې تورېږي

مرد چې حرف تر خولې بېرون کا

نه دی مرد که يې واژگون کا

له خولې هسې څه وباسه

چې ثبات پرې وکړې ناسه

کارپخته، پخته ويل کړه

په هغه کې ثبات تل کړه

که نور سل خبرې کاندې

په کې مه شه لاندې باندې

که وسوس په کې پيدا کړې

ثبات نشته بد به داکړې