تا هنر د سردارۍ نه زده بهرامه

تا هنر د سردارۍ نه زده بهرامه!

سرداري دې په خپل دور کړه بدنامه

هم تمامې خلېخانې لره بلا شوې

هم خپل ځان لره بلا شوې بد فرجامه

تا طاهر د کم عقلۍ په جرگو مړ کړ

اوس فارغ شوې د طاهر له انتقامه

تا خپل ځان لره د مرگ رخنه پيدا کړه

خېلخانه دې په بد خوی کړه بې ارامه

په دا هسې بدخويۍ بې بخته نه يې

چې لا نه يې د خوني هاتي تر ژامه

مشر ورور دې په زندان کړ، ته خانې کړې

دا خانې دې شه په ځان پورې حرامه

چې خانۍ ته دې هوس د زړه په زور کړ

لا ځايي وه ستا د زړه اندېښنه خامه

نور دې نوم زما د زويو په شمار مه شه

دخوشال خټک وينا په دا تمامه