تر هر چا نه د رښتينو کار اول دی

تر هر چا نه د رښتينو کار اول دی

خدای په خپله د رښتينو سره مل دی

په معنی کلپه روپۍ ده مخ يې تور شه

هر سړی چې په يارۍ کې په زړه غل دی

د بديو بد بويي، به پټه نه شي

که په سل پردو يې ونغاړې بصل دی

که د زړه سترگې دې شته، ننداره وکړه

د جهان په واړو چارو کې خلل دی

اباسيند وته نظر کړه، ودرېږه

ستا د عمر د اوبو غوندې چل چل دی

که دخولې ويل دې ښه دي په دا څه شي

چې ښکاره دې و عالم وته عمل دی

نه په زوړ پرېږدي نه ځوان نه نن زوولی

چې ناڅاپه ناتارونه کا اجل دی

بد کردار به نېک کردار نه شي خوشاله!

د شيطان لښکر و لاندې کړ قبل دی