هر بيمار چې د طبيب سره شدت کا

هر بيمار چې د طبيب سره شدت کا

که يې گورې و خپل ځان و ته افت کا

دماهي ژوندون درياب دی که ترې ووت

په خشکۍ کې به دی کله فراغت کا

ښاپېرک چې له افتابه نه پټيږي

د افتاب د کومې چارې خسارت کا

و مهتاب و ته د سپيو غپا کېږي

په غپا غپا ځان هسې فضيحت کا

د گونگټ د گل د بويه نه بلا ده

ژواک ژوندون واړه په بوی د نجاست کا

انبيا چې کافرانو و ته بد شول

واړه چارې د شيطان په مصلحت کا

خوار هغه چې دغليم په نغوته درومې

مدعې غليم د نېکو نصيحت کا؟

يو د رود په غاړه تږی تشنه لب مري

هر خسيس په خساست کې خپل عادت کا

د فرقان په هدايت فاروق پوهېږي

نه بوجهل ، بولهب ته هدايت کا

په اميد يې رغوي په ياس نړېږي

خلک د زړه د خيالونو عمارت کا

طهارت د مسلمان کېږي خوشاله!

نه اودس غسل د گبر طهارت کا