هر سړی چې په لاس ونيسي غلطه

هر سړی چې په لاس ونيسي غلطه

زمانه ورته پيدا کا ډېره سخطه

محبت محنت په خط کې سره يو شي

مخنث سره جدا شي له نقطه

مه يکلخته مړنی شه، مه غوولی

په دنيا کې هره چاره ښه ده وسطه

مصلحت يې په هر قط کې دخوبۍ دی

کاتبان چې قلم نه پرېږدي بې قطه

د زمري منگول گاوزې غواړي، غوړې

د شاهين حمله پرزاڼې ده، په بطه

بې ښه مخه به دې قدر، قيمت نه وي

د ښه مخ قدر کړه زده له خال وخطه

چې مدد يې مهتر خضر وي خوشاله!

د هغو بېړۍ به ورسي تر شطه