هر سړی په خپل کنگاش پوهېږي ښه

هر سړی په خپل کنگاش پوهېږي ښه

په خپل زيست او په معاش پوهېږي ښه

بزرگر د کر، د کيلې هنر ښه زده

بازرگان په خپل قماش پوهېږي ښه

ټولول به يې هغه کا چې ممسک وي

په باز نه يې قلاش پوهېږي ښه

څوک دې هيڅ ورته د مټ خبره نه کا

عاشقان په خپل تلاش پوهېږي ښه

د شرابو صفت څه کوې نور چاته

په دا کار رند و اوباش پوهېږي ښه

د عسلو په حلوا ماړه ناپوه دي

گرسنه په نان و اش پوهېږي ښه

قلمزن حساب، کتاب، هند سه رقوم زده

شمشېرزن په جنگ پرخاش پوهېږي ښه

وخوشال ته وايي خلک ښه پوهېږي!

ظن د خير دی، دی کاش پوهېږي ښه