واړه مست شو بد ويل کا

واړه مست شو بد ويل کا

و سړيو ته ښکنځل کا

سل بلا تر خوله وباسي

په تېره چاړه وژل کا

چې خپل زړه و چاته ورکړي

هغه چارې په تا تل کا

زه به څه ماڼه له چا کړم

په ما دا چارې زړه خپل کا

ځان به واچوم و سيند ته

څوک په دا هومره زغمل کا

ده پخپله دا فتنې زده

که بدخواه ورته ښيل کا؟

نه يې وېره د ازار شي

نه مې رحم په ژړل کا

چېرته ځم، په چا فرياد کړم

څوک به داد زما د دل کا

بل تاراج نشته خوشاله!

واړه عشق دی چې نتل کا