يا خو مه کړه! لېوني سره ياري

يا خو مه کړه! لېوني سره ياري

يا د کند د پهوړۍ کړه تياري

چې په نور څه يې حساب گڼي هغه زده

زه بې ياره عمر کل گڼم خواري

چې ديار د راغلو زېری په ما وکا

تر هغه سړي به زه شم بلهاري

په خرام کې د آهو علامت گوره

دگوزار وار يې خطا کړ د ښکاري

زما حال به و هغه وته معلوم وي

چې تمامه شپه بيدار، ستوري شماري

خدای دې تا په جهان تل لري ای باده!

چې زما د يار تر منځ کړې ريباري

معطر د ماه دزلفو نه رادرومي

ستا له بويه نافې ځار شه تاتاري

چې وعده د يار د وصل نژدې کېږي

د عاشق له زړه نه درومي قراري

که يې ستا د وروځو خال په نظر کښېووت

د خوشال شي نور له غمه وېزاري