يو څلوېښتم فصل - په بيان دعلاج د پردې د سترگو د باز کې

چې د باز پرده د سترگو شي ظاهره

درته وايم که غوږ باسې دا خبره

دا علت يې د عقلې د بد اثر دی

يا په ښکار کې سيخ دده په سترگو پر دی

ياخيرنې غوښې خوري له زړه يې ردې

دا آزار يې شي چې نه کا غوښې ردې

پټکړې، مشک و نبات کافور دا واړه

برابر يې سره واخله ويې نغاړه

په اوبو کې يې تمامه شپه لمده کړه

په سبا يې نور په سترگو د باز ته کړه

يو څو ورځې دا عمل چې په باز وکړې

بويه دا چې تر خانه يې بېرون نه کړې

دچارپايو غوښې باز لره ضرر دي

د چڼچڼو د رېزې ورته شکر دي

رس که واچوې په اور کې چې ښه سره شي

هغه رس دې ساړۀ شوي په اوبه شي

بيا يې واخله له اوبو ښه يې ميده کا

د باز سترگو ته يې تف ته په پخه کا

دا دارو هر گوره ډېر ښه دي عجب دي

څو بازونه په ده روغ دي مجرب دي