ذکر د ادويات

په دارو کې چې ښه نيت وي

دارو نه وي عبادت وي

عبادت په روغ صورت شي

گڼه کله عبادت شي

ما د طب په کتابونه

نظر وکړه په بابونه

چې هر رنځ لره فايده ده

هليله ده هليله ده

هم د مرد ده هم د زن ده

هليله شفا د تن ده

که درست عمر يې څوک خورينه

هيڅ علت به نه ورځينه

په ترتيب يې خوره هوښياره

مصالح ور سره ياره

په ماهي په حمل زويه

له عسل يې خوراک بويه

په غوايه په جوزا ياره

مله يې کړه گوړه اختياره

که سرطان وي که اسد وي

له نمکه سود بې حد وي

سنبله وي که ميزان وي

د شکرو سره جان وي

په لړم په لينده ښه وي

که ښه سونډ ور سره مله وي

جدي دلوه چې يې مړه کړي

بويه ښه غنيه خشته کړي

نيمايي مصالح بويه

نيمايي هليله ور سويه

دواړه توکه سره ته کړه

هر سبا يې خوړل ته کړه

هليله ده اوه قسمه

که خبر يې يې له اسمه

که يې کښم ويل اوږدېږي

هوښياران به خود پوهېږي

هليله په څو څربه وي

پاس په ونه ښه ښخه وي

ښه در نه په وزن گوره

هم هغه ښه وي ای روره

په دوه درې کاله زړه شي

تازه نوې دې خوړه شي

هليله که پروده شي

په عسل کې هم لا ښه شي