اوسنی او پخوانی مسلمان

زمکه دمکې وه بې اوبو او بې حاصله

نه پکښې يو گل ونه گياه زرغونېدله

نه پکښې ويالې وې نه چينې نه بارانونه

نه چا د بهار يا دخزان څېره ليدله

خلک و بېديا کښې وږی تږی سرگردانه

نه و تمدن نه مدينه چا پېژندله

ژوندو بې نعمته سړيتوب بې کرامته

کور دخدای پکښې و د خير طمع ترې کېدله

خدای پکښې پيدا کړ محمد (ص) د عبدالله نه

هغه چې ځانگو يې ملايکو ځنگوله

هغه چې يې راووړ مشرکانو ته توحيد

هغه چې کعبه يې له بتانو پاکوله

هغه چې يې عدل او انصاف راووړ جهان ته

هغه چې ددې دنيا څېره يې بدلوله

هغه چې خواران او غريبان يې عزيزان کړه

هغه چې په فقر يې شاهي وپرځوله

هغه چې يې وران کړ د فساد او ظلم کور

هغه چې دنيا يې بې دنيا ته جوړوله

دی هغه يو گل و، چې جهان پرې پسرلی شو

راغله دغه گل ته دجنت د باغ بلبله

رايې وړه نغمه ملکوتي خلک يې راويښ کړه

غوږ د شرق و غرب ته دا نغمه ورسېدله

رايې وړه باطن ته رڼايې دمعرفت

ننوته زړوته چې بيا هېڅ ونه وتله

دا ښايسته رڼا چې شوه ظاهره په انسان کښې

حوره د جنت يې تجلی ته پخسېدله

جوړه ميدنه کړه له يثرب نه محمد (ص)

ده د اسلامي تمدن سټه کېښودله

زړونه يې قوي کړه په ايمان د ايماندارو

ځکه به يو تن لسو ته ماتې ورکوله

جوړ يې مسلمان نه د جهان لوی قهرمان کړ

هر ځای د اسلام جنډه په سرورپېدله

لوی جهان شروع شو چې په الله اکبر به

زمکه له هيبته لکه پاڼه رېږدېدله

نن هغه قوت دی کله پاتې مسلمان کښې

هغه روحيه مسلمانانو وبايلله

وينو کښې اوس نه لامبي مسلم شو د اوبو مهی

نه ورکوي سر خو سرسايه يې ومنله

نه کوي جهاد نفل کوي او وظيفې کوي

مفت ثواب ته ملا مسلمانانو وتړله

تش د خولې په ذکر خدايه ستا خوښی، رضا غواړي

ستا رضا يې هر څه نه ارزانه وگڼله

هغه طاعت نکړي چې پکښې يو څه تاوان وي

مونځ کړي خو زکات باندې يې خېټه واچوله

هم د ظالم لاس ښکلوي هم د خدای کتاب

هم کښېني واعظ ته هم که ډمه گډېدله

هم څکي د زمزم اوبه او هم دمظلوم وينې

خان کوي هم دا او هم هغه کله نا کله

نيسي لا روژي خوماتوي يې په حرامو

هېڅ وخت يې حرامونه روژه ونه نيوله

هغه ښه سړی هم نشته اوس په کور او کلي کښې

ښه به يې چې ښکاره کول گناه به يې پټوله

رابه غی مسجد ته چې توبې به يې ويستلی

پټ به شوله خلکو چې توبه به يې ماتوله

اوس خو مجاهر فاسق الفته هېڅ خيا نکړي

اوس خو رقاصه لوڅه ميدان ته ووتله

دا مسلماني خو آخرت کښې پکارېږي نه

داسې مسلمان نه خو دنيا کښې څه جوړيږي ته