استعمارچيان

جالونه شته دامونه شته باښې لري تازيان لري

پښتونه ستا نيوو لره مارشال دپاکستان لري

سيسۍ ولي هوسۍ ولي وړې وړې مرغۍ ولي

د دوی له دامه خلاص نه دي هغه سيند چې مايان لري

د وسپنو پنجريې لري قفس غوندې کوټې لري

له بې گناه مرغانو نه بېشماره اسيران لري

غر څه ترې تښتېدی نشي مرغه ترې الوتی نشي

هېڅ وار يې خطانه درومي پخې سترگې ښکاريان لري

که زاڼې په هوا کښې وي که زرگې په خندا کښې وي

هيڅ رحم په چا نه کوي سخت زړه لکه سندان لري

څه جال لاندې راغلی دي څه لومو کښې نښتی دي

د دوی له لاسه وينو کښې شټکی ډير مرغان لري

نيول کوي وژل کوي په اور کبابول کوي

وريتې مرغۍ په هر وخت کښې په سود دسترخوان لري

په هر پټي کښې وينمه صياد دام غوړولي دی

په غرونو کښې لېوان لري ښاروکښې قصابان لري