بيا دې نوي شراب څښلي دي پوهېږم

بيا دې نوي شراب څښلي دي پوهېږم

په رخسار دې گل کرلي دي پوهېږم

که هزار ځله لاس سره کړې په نکريځو

تا زما په وينو وللي دي پوهېږم

معرکه زما د مرگ نه ده نور څه ده

رقيبان چې تا بللي دي پوهېږم

څه حاجت دی چې دی خط په ملا لولم

چې زما په باب دې کښلي دي پوهېږم

ته خپل جور و جفا څه وايې و ماته

ما همه واړه ليدلي دي پوهېږم

چې رقيب او تا غوږونه وبله وروړه

ماهغه ساعت ژړلي دي پوهېږم

رقيبان ځکه تېری په رحمان کاندي

تا په خوا پورې نيولي دي پوهېږم