غزل
چې گټل، خورول، بخښل کا ځوان هغه
خوشحال خان خټکچې گټل، خورول، بخښل کا ځوان هغه
چې توره لري، د تورې خان هغه
کان د لعل، د ياقوت، د گوهر څه دی
چې احسان ترې پيدا کېږي کان هغه
چې يې ته په گېډه وخورې حبطه شي
دمجلس سره چې خوړ شي خوان هغه
که دمال دی، که د ملک دی،که د لېچو
چې يې توان د چا په کار شي توان هغه
په تمامه شپه په ورځ په مياشته کال کې
چې دخدای په يادو درومي آن هغه
چې دې څوک د وړاندې وروستو ځي، دا څه شي
په تنها وجود چې شان دی شان هغه
و نور چا وته وران مه وايه خوشاله!
چې په قول، عهد وران شو وران هغه