چې په کار شي د سړي هغه سړی دی

چې په کار شي د سړي هغه سړی دی

گنې ښه ترې نه د پت په هکله سپی دی

چې دې زړه متکيف عقل فنا شي

بې له شکه هغه وگڼه چې دی دی

چې په سترگو کې يې آب د حيا نه وي

د زړه ډنډ يې هسې وگڼه چې لی دی

د عدم چې دي قايل ورته حيران يم

چې لاشی يې هم په فکر کې يو شی دی

تېر دې مچ کړو د هنر، زړه دې راډک شو

ورته خود د محبت راغلی قی دی

سليمان که په معنی يې خو مېږی شې

ځوانه ورک که دهمت در نه غمی دی

تږی ډېر د حقيقت پرې تېروتلی

چې په ځای د اوبو ډک له هواژی دی

خپل دې هغه چې په خوی در سره يو وي

خپل دې هم په خوی پردی که وي، پردی دی

حمزه خيال چې د شاعر څومره زړېږي

که له هرې خوا يې وگورې زلمی دی