چې په خوب شم ستا له خياله سره خواب کړم

چې په خوب شم ستا له خياله سره خواب کړم

چې بيدار يم دمخ سود دې په افتاب کړم

چې مې ستا دخولو بوی تر سپږمو تېر شو

نور به څه مينه په مشک او په گلاب کړم

بې نصيبه ليدل نه ميسر کېږي

په ليدو پسې که هر څو اضطراب کړم

ښه ليدل يې په مثال آب حيات دي

دا تشنه خاطر به کله پرې سېراب کړم

په دشنام مې کله کله سرفراز کړه

هغه دم چې د سوال طمع په ځواب کړم

ماته څه وايې چې چا هسې خراب کړې

چې د حال پوښتنه نه کړې تا خراب کړم

ماته وايه چې ولې پېچ و تاب شوې

ستا دې تورو زلفو هسې پېچ و تاب کړم

چې له مخه دې پلو واخيست، لمبه شوې

بېچاره خوشال دې درست سره کباب کړم