غزل
چې په مزه غوندې خبرې کوم
امیر حمزه شینواریچې په مزه غوندې خبرې کوم
داسې چپه غوندې خبرې کوم
ستا خوشحالي چې پکې وينم اشنا
ځکه خفه غوندې خبرې کوم
څوک پرې پوهېږي نه، خو خوند ورکوي
څه عجيبه غوندې خبرې کوم
ټيټې يې نه کړې ستا پخې سترگې
څه که کچه غوندې خبرې کوم
دا برکت د پښتنې ژبې دی
چې نارينه غوندې خبرې کوم
صفا صفا وي حيرانېږې ولې
زه آيينه غوندی خبرې کوم
راغلې ناڅاپه وارخطا دې کړمه
ځکه مېلمه غوندې خبرې کوم
له هغې ورځې چې ستا مخ مې وليد
څه تماشه غوندې خبرې کوم
چې د تا سترگو ته مې سم کتلي
نن د حمزه غوندې خبرې کوم