غزل
چې يې نقش په زړه خيال شي د اشنا
رحمان باباچې يې نقش په زړه خيال شي د اشنا
صدقه يې سر و مال شي د اشنا
پس له مرگه به يې تېغ هسې مخ روڼ وي
چې اشنا په تېغ حلال شي د اشنا
په اسمان د اشنايۍ به يې مکان وي
چې زمين غوندې پايمال شي د اشنا
تر ابده به يې بخره ملالي وي
له هغه چې زړه ملال شي د اشنا
خوشالي زما د زړه په هغه دم وي
په هر دم چې زړه خوشال شي د اشنا
روح هغه ساعت داخل گڼم په تن کې
چې مې دخل په وصال شي د اشنا
نور د هېچا قيل و قال مې په کار نه دی
چې تر غوږ مې قيل و قال شي د اشنا
هم هغه يوه گړۍ راباندې کال وي
چې يوه گړۍ محال شي د اشنا
زرغونه کاندي دانه زما د عشق
چې په زړه مې زرغون خال شي د اشنا
نه بل څوک زما طبيب بې اشنا شته دی
نه به بل څوک په مثال شي د اشنا
د رحمان نظر په هېچا باندې نه وي
چې نظر يې په جمال شي د اشنا