دا دروغ دي چې په ستوريو سود و زيان شي

دا دروغ دي چې په ستوريو سود و زيان شي

سود و زيان واړه په حکم د سبحان شي

که د رنگ خوبي يې شته بوی يې له کومه

د کاغذ گلونه هم دگل په شان شي

زمانه په طبيعت ده د هلکو

هلک تل چې و چا ورکا زر پښېمان شي

د دنيا اقبال چې مخ کا و نادان ته

دانشمند يې دخبرو نه حيران شي

دمنصب سره زما خبرې دُر وې

اوس راضي يم که په چا باندې مرجان شي

گوره!کومه چار به گانده مخ ښکاره کا

د عالم خبرې ډېرې تر دا ميان شي

د دنيا لالچ څو ډېر، اندوه يې ډېر وي

چې يې ډېره ټولوي، ډېر پرېشان شي

دانشمند څخه چې مال د دنيا نه وي

و عالم وته په مثل د نادان شي

زه خوشال خټک هغه يم، قدر نشته

دا مې واړه له افغانه نه، افغان شي