د گلزار ننداره

بيا وطن ښکاري تازه نوی بهار دی

بيا په غاړه د هر چا دگلو هار دی

باغ کې ځوړند دی د گلو اميلونه

ته خو گوره! ورته څنگه ښه گلزار دی

هر طرف څانگې ښايسته غنچې د گلو

د مستۍ دوره راغلی په بلبلو

ښې نغمې له هرې خوا غوږته رسېږي

په رښتيا چې بهار وړ دی د ستايلو

نن هرچاته خپله سيمه ښه گلزار دی

دا تاثير خدای نصيب کړی د بهار دی

مرغۍ باغ کې دی خوشحاله زرکې غروکې

هر طرف ته چې نن گورې لاله زار دی