د حق جذبه

د حق جذبه ده چې په ځوی د پلار بوتان ماتوي

يوه سړي باندې طلسم دجهان ماتوي

د سکندر له سده ټينگ دی يو په سله تقليد

دا راز سدونه خاوندان د ټينگ ايمان ماتوي

د خوف و طمع ، محبت او عداوت قيدونه

که هر چا مات کړه هغه مکر د شيطان ماتوي

د افلاطون په حکمت نه کېږي د حق پالنه

لښکر د ظلم ومعصيت ابن عمران ماتوي

په عقل نشي لوی کارونه په جذباتو کېږي

بد نظامونه د جنون او عشق طوفان ماتوي

د پلار نيکه په قدم مه ځه حقيقت پسې ځه!

هغه دود پرېږده چې حکمونه د قرآن ماتوي

خپلو پردونه مجرد شه لحاظو نه مه کړه

د حق ورمېږ مراعاتونه د انسان ماتوي