د ښادمنو په خندا ږو

د ښادمنو په خندا ږو

دغمجنو په ژړا ږو

د رندانو په رنديې

د شېخانو په تقوا ږو

په وفا د عاشقانو

د معشوقو په جفا ږو

د وصال په سل خوښيه

دهجران په زر بلا ږو

د بهار په ښو گلونو

د بلبلو په نوا ږو

چې ترې سبر ونې هيڅ دي

په هغه قد بالا ږو

چې مکحولې دي له نازه

په هغو سترگو شهلا ږو

چې نريه تر وېښته ده

په هغه باريکه ملا ږو

چې عاشق ورپسې مرينه

په هغه جمال زېبا ږو

چې راځي د يار له لوريه

په هغه باد سبا ږو

چې پيغام راوړي د وصل

د هغه قاصد په پا ږو

چې دويمه پکې نشته

د ريښتينو په رښتيا ږو

په دا هومره سوگندونه

صد هزار ځله بيا بيا ږو

چې تر ځان په تا مين يم

زه خوشال خټک په تا ږو